آخر المواضيع


العودة   منتدى 37 درجة > 37 درجه الترفيهي > منتدى وناسه نكت مقالب استهبال

منتدى وناسه نكت مقالب استهبال منتدى وناسه نكت ,فكاهة ,ضحك ,مقالب تنكيت لكاعة استعباط

إضافة رد
أدوات الموضوع انواع عرض الموضوع
قديم 05-02-2019, 02:58 PM   رقم المشاركة : 1
مَآيِن كَآمبِيف
آنقلع عن وجهي
 
الصورة الرمزية مَآيِن كَآمبِيف





افتراضي رسالةة الى خادم الحرمين الشريفين ، حفظه الله

بسم الله الرحمن الرحيم


المكان :
المخزن بجوار فار فسقان جنني بقضم الاسلاك
واخر شيء بعد مفاوضات عسيره معه قررت اجيب له الاسلاك بنفسي
واقعد فوق راسه حتى يخلص تقضيم فيهن
الزمان :
الساعه 10 ونص ليلا
المناسبه :
زواج ابننا الشاب صالح على كريمة عمي صنهات .. وبدون خنبقه المناسبه هي رساله لخادم الحرمين الشريفين الملك عبدالله حفظه الله ..
......
الملك عبدالله بن عبدالعزيز
سلام عليك ورحمة الله وبركاته ..
ملكنا العزيز .. ماعرفنا عنك إلا كل خير .. قلبك الأبيض وصدرك اللذي يتسع للجميع بس حسبي على من يحول بينا وبينك
وعلى ذالك قررت أسحب عليهم كلهم وارسلك هالرساله وتراك ان مالقيتها بالوارد شيك على الجنك ميل واذا انت محدث الايفون تلقاها بالمنشن حقك ..
يابو متعب .. أنت فزعت للمغرب ولو بيدك فزعت للظهر والعصر بس السكه طويله والأماني كثار ..
انا اعتبرني القايله بل اعتبرني حمار القايله فقط ارجوك وأستعطف قلبك بأن تعطيني وجه وتسمعني ..
آهـ يابو متعب مدري من وين أبدا؟
أنا أقوم الصبح يابو متعب واروح اداوم وعشان اركب سيارتي لازم اطق على جاري موسى ستين مره عشان يوخر سيارته عن سيارتي لأني يابو متعب من سكنت الشقهه وانا قايلن لأهل الحاره كلها ترا الشجره ذي حلي بها.. ويجي موسى ويوقف سيارته فيها ويروح يركب ليموزين بس عشان ينكد علي .. شفت يابو متعب راح التآلف من مجتمعنا وراحت القلوب الطيبه والعطف والحنان .. يابو متعب ميزانيتنا عشرطعش مليار ريال .. عطوني منها ستمية ريال احط فيها مظله ولا ازرعولي شجره وبلا منة موسى ياخي
اروح لدوامي يابو متعب بها الصبح واطيح بالزحمات المروريه ولانيب زعلان منها ادري انها شي غصبن عليكم وحتى ذاك اليوم تهاوشت انا واحد من اعداء الوطن بتويتر يغرد ويقول اذا تبون تنحل مشكلة الزحمات جيبو قٍطَارتنا الي عطيناها الدول الشقيقه .. وقلت له لا والله ماهو حنا الي نعطي وبعدين نسترد عطانا والدوله نيتها زينه والدليل ان شركة ابل اخترعت الايفون وصار المواطن بدال مايتبهذل وينغث بالزحمه يفتح تويتر ولا الواتس اب ويجلس يروق عليهن ولاعاد يهمه الانتظار وكم يجلس بوسط الزحمه .. وبعد ماقلت له هالكلام ياطويل العمر قلت للعيال عطوه ريبورت سبام واقبعوه انفلو ..اجل بخليه يغرد كل شوي ويسمم افكارنا ؟!
انا ماهو ذا الي غاثني وقاهرني يابومتعب .. الي يغث اني كل صبح اذا فتحت ام بي سي اف ام .. تخيل يابو متعب ان اول صوته اسمعه هو صوت خديجة الوعل .. ليش؟ آذاني سبيل ولا انا متلقي الضربات؟ اشتقت لحسن كراني يابو متعب وخديجة مانباها مانباها ..
تدري يابو متعب .. راتبي ثتللاف ريال .. وانا تراني مواطن صالح منيب أشتكيلك من قل الراتب ياربي لك الحمد من شاف اهل حافز وتحديثهم له كل اسبوع وخصميات هالميتين ريال .. حمد ربه وشكره على هالثتلاف ريال اقل شي تجيه كامله .. بس عاد اللي ماتدري عنه يابو متعب اني سويت للمرور إستقطاع بالراتب كله ويرجعون لي اللي يبقى منه بسبة ساهر .. عاد ذميمين الله يبارك فيهم نوب حسابي ينزل عليه سالب , راتبي 3000 ريال والمخالفات ست الاف ريال ويقولون عادي غيرك يرهن عمارته أو مزرعته بس مابعد صار عندي عماره ولا راح يصير لأني مقدم على البنك العقاري من سنة الكسوف وعارف ان عيال الكلب عيالي هم اللي بيلهطونه بعد ما اموت , ولاتحسبني زعلان من ساهر .. ساهر للحكومه واللي للحكومه ماهو خساره بس عاد سيارتي كورلا تأجير من تايوتا وكل يوم وموظف تايوتا طلايب معه لايسحبها وانا ماعلي منه يسحبها عادي لو امشي على رجليني بس ساهر من وين لهم مخالفات لاسحبوا سيارتي؟ اجلس تطفر الحكومه بسبتي انا وكسرة موظف في تايوتا خسيس ولص مايدري اني أكد على الدوله بسيارتي والله من كم مشروع حكومي طلع من ظهري ولله الحمد ..
وحتى لو طلع من ظهري مشاريع مالي ياطويل العمر فضل ولا منَه .. يعني انا من وين بجيب هالدراهم ؟ كله من هالوظيفه يعني منكم وإليكم يالله لك الحمد والشكر ..
ووظيفتي ابشرك زينه على بشرككه ومديرنا اللبناني طوني جوزيف مواعدني بالترسيم يقولي تستاهل عشاني قد علمته ان حسين خوينا مايحب اللبنانين ويقول انهم اكلو خيرات هالبلد وعيال البلد اولى منهم .. واستانس مني طوني عشاني رديت على حسين وقلت له ياحسين هذولي اصحاب شهادات ووجيهم تجيب الرزق واناقتهم المفرطه تفتح النفس ولهجتهم اذا تكلمو تخلي العميل يوافق بدون مايشاور .. اما انت ياحسين شكلك يسد النفس ويقطع النسل ولو يتصبح الواحد فيك امسى بحادث .. ولهجتك وانا سعودي مثلي مثلك تروعت منك ذاك اليوم يومك تكلم امك بالديره ,, قعدت تقول كلام نصه مافهمته وشوي ولا يرادوني ابليس ابلغ عليك الجوازات حسبتك من مخلفات الحجاج..

ومن يومها والاستاذ طوني مبسوط مني حتى انه عزمني في الفيلا حقته بشمال الرياض .. فيلا يابو متعب اشك ان عندك كبرها بس ذاربها مافيها مشب ماش طوني ماله بالشكاله وعلوم المراجل .. جلس طوني على كرسي هزاز وانا جلست على الارض وقالي شو بدي ئلك ياخيي أديش عددكون بالبيت؟
قلت امي وابوي واخواني سبعه وابوي يراجع بأمي يبيها تجيب هاتريك عيال يقول ودي يكملون العشره عشان اخذ مساعده مقطوعه من الضمان الاجتماعي ..
قام يتهزهز طوني على الكرسي وسألني وقال ياخيي ضمان شوو؟ ليش انتم جاييين من توكيلات الجزيره بضمان ههههههههههههههه
قلت ياطوني بلاا ماعندكم الملك عبدالله هاذي مساعده مقطوعه لشعب الله يخليه لنا ويديمه فوق روسنا..
قال طوني وهاي من شان شو؟ قلت هاذي من شان نبقى عايشين عشان يصلخنا ساهر وسلالتنا يحدثون حافز ..
ومن يوم طلعت من عنده وانا شايفه مثلي الأعلى وحسين مثلي السفلي .. كان ودي اني كملت دراستي عشان اصير مدير قوي مثله بس ابوي فصلني بعد الثانوي وقال بلاجامعه بلا هم هذا ولد جيرانا حمود درس الجامعه وخلصها ومرتن يصور مع شهادته ومره يبلها ويشرب مرقتها .. وقفت انا وصرخت صرخة الأسد الجسور الغضنفر الليث وقلت يايبه الحكومه ماقصرت عقب الجامعه سجل بالمرور جندي أول وصرفوله دباب يفحط فيه ويستاسع صدره ويكفي انه يعرف اماكن ساهر ..بالله يايبه لو انه متوظف وراتبه 15 الف ولا يدري وين ساهر وش ينفعه راتبه فيه؟؟
لكن ابوي مااقتنع وقفلت معه وغصبني اتوظف عشان اكد معه على البيت واساعده بالمصاريف ويابو متعب ياسنايدي ابوي ملعوب عليه بسالفة هالمصاريف الواجد ويحسب انها جشع التجار مايدري ان البلا بعياله والورعان فسدت يابو متعب اي والله فسدت عقب الجريش والرز الرصَيٍص صاروا يدورون سنكرس عشان الواحد يقول قلبي الصغير لايتحمل ولا كورن فليكس اللي يخلطونه مع الحليب الله يديم النعمه بلاهم ماذاقوا المريس اللي كانت تمرسه لنا جدتي يتطروالي بطعمه الى يومك هذا يابو متعب ..
لكن ابوي سبحان الله زي القلم لادخلته بالمروحه القعاديه يعلها عل مثل ماعلني يقول ماهو صحيح كلامك اجل ورا الدجاج زاد غلاه؟ قلت يايبه يايبه متى تدري ان الحكومه بعيدة نظر وبدون دربيل بعد .. يايبه الدجاج ينفخ صدور الرجاجيل بكره بدل مايتقضى ابو شنب من سوق الزل يشتري ستيانه من نعومي واشوفك بكره يايبه مقاس صدرك 42.. تفل بوجهي وقال ابك ماتهبااا يالخسيس واقتنع ابوي وبالدليل القاطع ان الحكومه في صف المواطن ..
لكنه قال ابك كان الدجاج هاذي علومه وش ناكل والذبايح مالنا فيها قدره اجل الذبيحه بألف وثمان وكله من هالشعير المرتفع ونفس الأسد اللي صرخ في وجه ابوي قبل شوي رجع يصرخ في وجهه ثاني مره وقلت له يايبه الحكومه دعمت الشعير بس بعض خلق الله صار ينافس البهايم على عيشتها ويشتري الشعير عشان يشرب مويته بزعمه ان زين للكلاوي.. يايبه لاتقنعني ان الحكومه مقصره . الحكومه تحسب لشيء مانحسب له ولا من تطري عليه ان الاراضي الفاضيه تشبك بالاسلاك عشان مايتلاقطون عليها سفهان خلق الله ويسكرون فيها ويقطعون عنا المطر..!
وماودي اطول عليك يابو متعب لاني انا وابوي مثل ديكين في شبك مناقر 24 ساعه عند هالحكومه الرشيده وانا ادري ان البلا ماهو منكم الا البلا منه بس ذبح وصلخ وبعثرة الدراهم على المواجيب والجيران البعيد والقريب حتى جارنا اليماني والمصري معشيهم مثل الحكومه بالضبط يابو متعب يوم تدف الدراهم لمصر واليمن..!
بس انت عاد الله لايضر الحكومه تعطي من قوه وغناه وابوي يعطي من جوع وقل,, بسبة دبرته العميا عياله ذابحهم الجوع..!
عاد تدري يابو متعب كل اللي فوق ماعلي منه ياسنايدي
انا بس ودي كان لك قدره ولا فيها احراج ان سليمان العيسى يطلع بالأخبار بمرسوم ملكي يمنع حركات دق واقطع ..لن واحد من الربع عنده خويه اسمها سوسو ذبحته بس تدق وتقطع عليه,, وهو بس يدفع بها الفواتير ويدف لها بطاقات سوا ولا قلت لك امنعو هالحركه عشانه عيالنا صارو خروفان و باقي لهم شوي ويحرج عليهم بسوق الغنم,, لا ياطويل العمر الي قهرني ان حتى الحب صار فيه غش .. شفت اني رجال حنون ورمانسي خويته كانت تقوله انا سمراء شوي وهو صدقتها لو ان قلبه المسكين أكله من طاري سمرا شوي لكن يوم قابلهها اكتشف ان ست شهور من حياته راحت خساره وهو يحب خاله ..!
هذا غش ولا ماهو غش ياطويل العمر ؟ تسانه غش تكفى يبومتعب طلع لنا هالمرسوم وفك الشباب السبايك ..
وانا ابشرك بعد ماتركهااا صار يحب يابو متعب واعلمك وانا مستحي منك بس مثلك عارف حركات الشباب والاهلي ,,القلب يخفق والأنفاس تتسارع وهالمره طلع ابيض من النجفه الي فوق راسه ودهه يعرس ويكون أسره مير البلا هو خاطبها ولد عمها مبتعث وهو متزوج عمهه اللي ماتفرقها عن عمي لكنها بدون شنب .. شف لنا دبره ودي كذا تدبر له طريقه يذبهاا فيها من الجسر الملعق كنه حادث ويطلع منها سالم عاد شغل مباحث ماراح تعوق معكم ,,
واللي خاطب حبيبته المبتعث كان مايكوّد عليك تشوفون له دبره وتقبض عليه المخابرات الدوليه وياليت الاستخبارات الروسيه الكي جي بي عشان يضمن انه مايرجع وتراه قبل عشر سنين سمعت انه يدخل الساحات السياسيه ووالرسيفر حقه فيه قناة الاصلاح والظاهر اني ماقصرت جمعت لك أدله كافيه توديه ورا الشمس بخمس عشان يخلا لخوينا الحبيب الجو مع حبيبة القلب وانت اكبر من انك تفرق بين قلبين وليفين وياليل ياجامع على الود قلبين وانت الليل اللي تسطع فيه الشمس عاد لاتسألني وشلون تجي هالمدحه بس شف لنا دبره ..
وقبل اختم رسالتي ياطويل العمر .. لايهمك القرق الي فوق كله اهم ماعلي هي الشجره هي لب الرساله وهي الي منكده علي حياتي.. تكفى يابو متعب لاتنساها وفكني من موسى حتى عمره ماعاد اعتمر اخاف ان رحت لمكه ارجع وألقاه رابطها بسيارته..

وشفت اني جمعت لكك حتى مشاكل اخووياي وكان ودي اجمع لك مشاكل الحاره ومطعم الحاره بس بعدين ان شاء الله
والله ي رجككم ، وشكلناا من زقاره خوينا رحنا ورى الشمس

بس وش رايكك ماني حليت مشكله الشجررهه ومشكله خوينااا الخروف ، اسئلكك ب الله ماستااهل ، مكااافئهه ي طويل العممر ،


إبنكم المواطن المخلص للأبد/ احح شطفني الجمس

 

منتدى 37 درجة



آخر مواضيعي

0 ماسنجر بلاك بيري للاندرويد - تحميل ماسنجر بلاك بيري للجالكسي
0 "أنـآ" أكبر من احلامك يا مدري وش يسمونك
0 ساعات رجاليه ماركه Julius homme - Boy London - dkny - sinobi
0 اسماء ماركات عطورات رجاليه ماركه عطورات رجاليه 2019
0 نصاائح لاآناقتك نصائح لمحبي الاناقه للرجاال man
0 عطر كريد افينتوس الجديد 2019- man- Creed Aventus
0 سرقتك بالزمن لحظه وعشتك بالفراق اوقات

آخر تعديل بواسطة مَآيِن كَآمبِيف بتاريخ 05-02-2019 الساعة 03:36 PM .
  رد مع اقتباس
قديم 05-02-2019, 03:27 PM   رقم المشاركة : 3
روح الفرح
كبار الشخصيات
 
الصورة الرمزية روح الفرح
افتراضي رد: رسالةة الى خادم الحرمين الشريفين ، حفظه الله

بسم الله الرحمن الرحيم

والله ياخوي الرساله طويله

قريت إلى ساهر وماله للحكومة
أقراها قريب ان شاء الله
شسمه وش رايك أعطيك ٦٠٠ ريال تحط لك مضله
وترتاح من موسى وغثاه
لان اذا بتنتظر شسمه المهم أنها سالفة شجره
ياخوك سليمان العيسى متوفي وين تبي يجيب خير منه
الظاهر علومك ضايعه
وسالفة الخاله معك تحفه
عاد من قالك تحب وتذبح نفسك
دور لك عائله عندهم بنت حلال وتزوجها وارتحً
بس فيه مشكله بعد المهر والشقه
ياليل الليل تدري كيف خلك بشجرتك انت وموسى احسن

المهم اني قريت اول الرساله وآخرها
الوسط ارجع بعدين أقراها

 

منتدى 37 درجة

آخر مواضيعي

0 سالفه بالجامعه تلبية طلب عبود
0 بلايز شيك 2019
0 اكسسوارات ديور 2019 Dior
0 فساتين زفاف ايلي صعب 2019 فساتين زفاف 2019
0 أذكار الصباح
0 تعبير قصير عن اليوم الوطني
0 بروسونال للواتس اب عن اليوم الوطني 2019 بروسونال اليوم الوطني واتس

  رد مع اقتباس
قديم 05-02-2019, 04:00 PM   رقم المشاركة : 4
D.Love
اكوس مدير بالعالم
 
الصورة الرمزية D.Love
افتراضي رد: رسالةة الى خادم الحرمين الشريفين ، حفظه الله

بسم الله الرحمن الرحيم

سوالف |يوميات الاعضاء سوالف في الكوفي ,السوق , المدرسة او حتى الشارع :: لايسمح بالمنقول ::




الموضوع منقول من منتدى اخر


ينقل للقسم المناسب

 

منتدى 37 درجة

آخر مواضيعي

0 مسلسل البروفيسور La casa de papel
0 تجربة ويش للتسوق موقع ويش للتسوق wish
0 تجربة موقع سيفي - تجربة التسوق من موقع سيفي sivvi
0 تجربة التسوق من شي ان - تحميل تطبيق شي ان SheIn
0 كيكة تخرج 2020 بالصور كيكات تخرج 2020
0 جنسيات ضحايا مذبحة المسجدين في نيوزيلندا
0 معرض الكتاب بالرياض 2019 متى مواعيد زيارة معرض الرياض للكتاب 1440

  رد مع اقتباس
إضافة رد
المواضيع المتشابهه للموضوع: رسالةة الى خادم الحرمين الشريفين ، حفظه الله
خادم الحرمين يوجه باستضافة عائلة الشهيد فرمان خان لأداء الحج


الكلمات الدلالية (Tags)
الله, الحرمين, الشريفين, داخل, حفظه, رسالةة

جديد مواضيع قسم منتدى وناسه نكت مقالب استهبال
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are معطلة
Pingbacks are معطلة
Refbacks are معطلة

الانتقال السريع


الساعة الآن 06:25 AM



المنتدى لايتبع اي جهه وكل مايكتب في المنتدى يمثل وجهة نظر كاتبة فقط

Powered by vBulletin® Version 3.8.11
Copyright ©2000 - 2019, vBulletin Solutions, Inc.
SEO by vBSEO ©2011, Crawlability, Inc.